તારા ઘરથી અલગ સખી મારું ઘર નથી.

મુકદર ક્યાં  લઈ   જશે એની ખબર નથી,

આમ મજધારે ડુબાડનાર કંઈ અવર નથી. 

દોસ્તોની  દુવાએ  કેવા  દઝાડ્યા  જુઓ

દુશ્મનોની બદદુવામાંય એવી અસર નથી. 

મારા ઘરમાં આગ ચાંપતાં વિચારજે જરી,

તારા ઘરથી અલગ સખી મારું ઘર નથી. 

તને ભુલીને જ હું ભટકી ગયો રાહમાં,

આ તારી યાદ કે વિરહની અસર નથી. 

જડમુળથી સુકાઈ રહયું છે મારું જીવનવૃક્ષ,

પીળા પડતાં પર્ણનું કારણ પાનખર નથી. 

“નારાજ” નોતરી છે ઉદાસી અમે એવા ભાવથી,

મળે ખુશી તો  કહેજો  હવે  એની  કસર નથી.